आक्टोपस च्या संघटित जनानखान्याकडे

आक्टोपस च्या संघटित जनानखान्याकडे आपण जात आहोत
मी ६५ मार्चची वृषभचिन्हांकित मुद्रा
माझे ऐवज मोहंजोदारो
मी रेखालंय सिंहस्तंभ शीर्ष
माझे अलंकारिक दिवसमान
पायापासून उत्सर्जित
माझे कॅटोकोम्बस हातोहात मोकळे
तुम्ही विखरा आवारात दहीदूधलोणी
आक्टोपसचे संघटित जनानखाने आपल्याकडे येत आहेत

जेवताना माण्सं भेसूर भयावह
अन्नान्न दशमानात अधोरेखित
१९७० च्या गर्भाशयात
रजस्वल आवा
बिछान्यात हाताच्या कर्तृत्वात पक्षपाती वणवा
आतड्यात भांग
ज्यांनी ज्यांनी गमबूट घातले असतील त्यांनी त्यांनी हात वर करावेत
आक्टोपसचे संघटित जनानखाने आपल्याकडे येत आहेत

गर्भधारणेनंतर मादी नराला खाऊन टाकते
१२३४५६७८९० हे सर्व झाडांचे नंबर्स
एखाद्या दिवसाचा संथपणा आपणास गतीत सामील करावा लागतो
राप धरलेला चेहरा बाजारात बसवावा लागतो
बाजारातून उठवावा लागतो
आपल्यापुढे चार आणि शून्य आहेत
शून्यातून चार संभवतात चा-ही अंगानं पांगतात
चारापुढे शून्य ठेवला तर ४० घडतात
चाराच्या खाली शून्य पसरवला तर
चार शून्याने मजबूत होतात
चार । शून्य यांच्या सहवासातच आपण
॥ इन्किलाब जिंदाबाद ॥ म्हंतो
॥ रक्ताचा ध्वज ॥ रोवतो
चार आणि शून्य चाचपताना ज्यांनी जपली ग्लानी
ते सदोदित राहिले गुलामांचे गुलाम
गर्भधारणेनंतर मादी नराला खाऊन टाकते
तुम्ही विखरा आवारात दहीदूधलोणी
आक्टोपसचे संघटित जनानखाने आपल्याकडे येत आहेत


नामदेव ढसाळ
गोलपिठा
संकलक:प्रवीण कुलकर्णी