खाजगी दु:खास दैवी मानणारा वेगळा!
राहूनी माणूस अश्रू वाटणारा वेगळा!
पेटल्या वस्तीत चर्चा ही अशी नाही बरी;
-तो निखारा वेगळा अन हा निखारा वेगळा!
ते भिकारी थोर, त्यांच्या धर्मशाळा वेगळ्या,
चालतो कंगाल सत्याचा गुजारा वेगळा!
सोसण्या आयुष्य थोडे, सोसुनी घ्यावे हसू;
त्या विषासाठी विषाचा हा उतारा वेगळा!
नेहमीच्या यातनांची कैद ही नाही खरी,
मात्र मेलेल्या मनाचा कोंडमारा वेगळा!
हा न टाहो दु:खितांचा, हा सुखाचा ओरडा;
_होत आहे दूर बंडाचा पुकारा वेगळा!
जगलो जेंव्हा न होता माझियापाशी दिवा;
मी निघालो अन उदेला एक तारा वेगळा!
सुरेश भट
संकलन:प्रवीण कुलकर्णी
No comments:
Post a Comment