आज गोकुळात रंग खेळतो हरी;
राधिके, जरा जपून जा तुझ्या घरी!
तो चटोर चित्तचोर वाट रोखतो,
हात ओढुनी खुशाल रंग टाकतो
रंगवुनी रंगुनी गुलाल फासतो...
सांगते अजूनही तुला परोपरी!
संग श्यामसुंदरास काय जाहले?
रंग टाकल्याविना कुणा न सोडले;
ज्यास त्यास रंग रंग रंग लागले!
एकटीच वाचशीस काय तू तरी!
त्या तिथे अनंगरंगरास रंगला:
गोपगोपिकांसवे मुकुंद दंगला;
तो पहा मृदंग मंजिर्यात वाजला...
हाय! वाजली फिरून तीच बासरी!
सुरेश भट
संकलन:प्रवीण कुलकर्णी
No comments:
Post a Comment